Tusi Pasefika a Amata: FAAFETAI, JOHN HOWARD
January 03, 2008

A'o fa'aauau pea ona taga'i toto'a taitai sinia o le malo tele i tulaga o lo'o tula'i mai i totonu o Pakisitani, i le lamalama faai'u o le tausaga 2007, o lo'o iai pea nisi o taitai o le malo tele o lo'o faasaga mai la latou vaaiga i mea o tutupu i totonu o le Pasefika, talu ai ni palota e lua i le masina ua mavae, lea e ono tula'i mai ai ni suiga tetele i le tulaga o le malo tele i totonu o le Pasefika.

I lo tatou aga'i atu i le 2008, e le o manino mai i le taimi nei, le i'uga o le palota a le atu Malesala (RMI) lea sa faataunu'uina i le aso 19 o Novema. I lenei malo palemene, e 33 nofoa o lo'o tauivi ai sui tauva. Mai i le 17 nofoa e mana'omia e faagaioia ai le malo, ua tofu itu agai ma i latou o le a toe taumafai mo tofiga, ma nofoa e ta'i 14 pe 15; o nofa o totoe e fa pe lima o le a maua e sui tauva tutoatasi. E faatoa manino mai le i'uga o le palota i le amataga o Ianuari, ma o lenei palota e aofia ai ma le sailiga o se peresetene fou.

O lo'o vaaia pea le faatuiese o le itu agai i se maliliega (Compact of Free Association) na faia e le malo ma le Iunaite Setete i le tausaga ua mavae, i tulaga tau tupe ma atonu o le a o latou toe faatula'i lenei mataupu i Uasinitone pe afai ae malo le latou itu. E le gata i lea, ua fa'aalia foi so latou manaoga ina ia suia mai fegalegalea'iga faavaomalo a le atu Malesala ma Taiwan, ia Beijing.

E le'i atoa se vaiaso talu ona mae'a le palota a le RMI, ae tu malosi mai tagata palota a Ausetalia, i le faamutaina o le 11 tausaga talu ona pulea e le vaega ua ta'ua o le "Liberal Party-National party Coalition", e ala lea i le faa nofoia o sui e to'a 23 o le itu o le Leipa (Labor Party) i totonu o le Maota Maualalo. I totonu o le maota e 150 nofoa, ua umia nei e le palemia fou ia Kevin Rudd ma sui o lana vaega (Labor Party) ia nofoa e 83.

O John Howard, o le palemia lona lua lea a Ausetaila na le faamanuiaina ana taumafaiga mo le toe tula'i mai, i le palota lava e tasi na le faamanuiaina ai foi taumafaiga a lana itu.

I le tula'i mai o le Malo o Leipa (Labor Government) i totonu o Ausetalia, ua amata va'aia ai ni lu'itau mo le Iunaite Setete. Mo se faataitaiga, i le toa'i tula'i mai o Rudd, na faataunuuina ai se fonotele i Bali i tulaga o le suiga o le tau (climate change) ma na faapea ona sainia ai e Rudd ia se tulafono ua ta'ua o le "Kyoto protocol". Ae peitai, o lea tulafono, i le vaitaimi o Howard, sa 'aufaatasi ai Ausetalia ma Amerika, e tete'e i lea tulafono, ona o tulaga e ono a'afia ai le tamaoaiga o malo e lua.

E le gata i lea, ae e le'i faia le Kerisimasi, na malaga ai Rudd i Iraq mo le ave'esea o fitafita Ausetalia mai i totonu o Iraq, o se tasi lea o ana folafolaga i lana kemupeni i tami o palota. O le masina o Iuni o le tausaga nei, ua faamoemoe Rudd e ave'esea ai fitafita uma a Ausetalia mai i Iraq.

I toe sauniga o le maliu o se tasi o Toa-o-Samoa, na saunoa ai le afioga i le Kovana Sili o Amerika Samoa e tusa ai ma ona lagona i lea folafolaga a Rudd, ma e ui ina e leai se manatu fa'aalia o Amata i le saunoaga a le afioga Togiola Tulafono, atoa ai ma le le toatele o fitafita Ausetalia o le a ave'esea mai i Iraq, ae peitai, ua avea lenei suiga ma tulaga ua atili ai ona tutoatasi Amerika i lenei mataupu o tula'i mai i le Tafa-o-Taua.

E le o manino mai i le taimi nei, ia suiga o le a tula'i mai i totonu o le Pasefika, ona o le suiga i tulaga faale taitai i totonu o Ausetalia. I vaitaimi o tula'i mai Howard, sa tele ina ta'ua Ausetalia o le 'sui komesina' a Amerika i totonu o le Pasefka. Ma e moni, ua le o toe pei le Pasefika, e pei ona sa iai i la tausaga ua mavae. Ua va'aia le tula'i mai o ni faafitauli i le va o Ausetalia ma Papua Niu Kini, atoa ai ma nai faafitauli i feutagaiga ma le atu Solomona, e auala mai i le Misiona Fesoasani i le Pasefika (RAMSI). E le gata i lea, ua va'aia foi nisi o faafitauli i lo latou va ma Fiti ma Toga ma ua iai foi nisi o malo ua fa'aalia lo latou le fiafia i tulaga o tulafono tau siomaga a Uasinitone ma Ausetalia.

E le o mailoa i le taimi nei, le tulaga o le lumana'i o le Iunaite Setete i totonu o le Pasefika ona o suiga ua tula'i mai i Ausetalia. Ae le gata i lea, o lo'o ua tele ni tulaga le mautonu i le lumana'i i suiga e le o toe mamao, i tofiga faale taitai i totonu o le laumua i Uasinitone.

I ni manatunatuga o Amata e tusa ai ma John Howard, se tasi o palemia a Ausetalia, na umi o nofoia lea tofi taitai, na o la feiloa'i i Canberra i le 1986, a'o ia taitaia le Itu Agai (Opposition), na talimalo ai i ni taitai talavou mai i Amerika, lea na aofia ai ma Amata. O le taimi lea o loo' avea Bob Hawke ma palemia o Ausetalia, ma sa iai se talitonuga i lea taimi, e le'i taitai ona o'o le sulu ia Howard, pe o le a faapea foi se umi o lana taitaiga.

Na saunoa Amata, i le tu'ua e Howard o ona tofiga i totonu o le malo ma tulaga faapolokiki, ua faamanatuina ai se la talanoaga ma le afioga Tauese, ae e le'i tu'umalo. O le taimi lea ua toe tula'i Tauese i le tofi Kovana ma ona ua le mafai ai ona ia toe taumafai mo lenei tofiga, na fesiligia ai o ia e Amata i sana fuafuaga mo le lumana'i, pe o le a taumafai mo seisi tofiga, pe o le a ia faatali mo le fa tausaga ona toe fo'i mai lea e toe taumafai mo e tofi Kovana. Ae o le tulaga sa le'i nofo malamalama ai le toatele o tagata, na aofia ai a Amata, o le tele o taimi e masani ona tapa ai Tauese i le afioga Coleman mo ni fautuaga i nisi o mataupu.

Na fa'ailoa atu e Tauese ia Amata se tasi o a la talanoaga ma Coleman, ina ua faato'a maea le palota 1996. Na fautua ai e Coleman, se tasi o Kovana na sili ona umi lana nofoaiga i totonu o tala faasolopito a Amerika, ia Tauese, o se tasi o ana filifiliga ua salamo ai, o le filifiliga lea ina ia nofo uma i le nofoa kovana. Na fautuaina e Coleman ia Tauese ina ia lelei lava le 'fiafia puupuu'. O lea na tonu ai i le manatu a Tauese, o le a le toe taumafai mo se tofi faalemalo pe a maea lana nofoaiga lona lua. Ae paga lea, i le vala'au pa'ia a le Silisili Ese, ua faamanavaina ai galuega a le afioga Tauese.

Na ta'ua e Amata, i le taimi na ritaea ai lona tama, sa leai se manatu i lo latou aiga, o se faamanuiaga, ae peitai, na mafai ona tele se taimi na mafana ai le mafutaga ma le tama ina ua tu'ua ona tofiga faale malo. E tu'ua e Coleman ona tofiga faale taitai, ua tulaga faaletonu lona soifua maloloina.

Ua manatu Amata, atonu e aoga le fautuaga a si ona tama na tu'uina atu ia Tauese, mo John Howard. I le 68 tausaga o le soifuaga o Howard, ua mafai nei ona fa'aalu lona taimi ma si ana fanau ma fanau a fanau. Ma e ui i le tulaga na iai lana taitaiga, e tatau lava ona momoli le faafetai ia Howard, e tusa ai ma lana tautua i tagata o Ausetalia.

E ui lava i molimau a vaega faasalalau i Uasinitone, i le fesoasoani malosi o lo'o maua e le Iunaite Setete mai ia Peretania Tele, ae peitai, sa mafai foi ona maua lea lava fesoasoani malosi a le Iunaite Setete mai ia Ausetalia, a'o i lalo o le taitaiga a John Howard.

Ua faapea ona momoli le agaga faafetai o Amata ia John Howard, e tusa ai ma lana tautua faapea foi ma le agaga faa uo.

Afai o iai ni mataupu e fia talanoaina ma Amata, e mafai ona e imeli i le tuatusi; .

Osini Faleatasi Inc. dba Samoa News reserves all rights.