Tusi Pasefika a Amata: FAAILOA ATU MA FEGALEGALEA'IGA
October 26, 2007

Samoa News

Ina ua fa'aalia i se tama matua mai atunuu i fafo ia se fa'afanua ma faasino iai le vaega o iai atunuu o Samoa, ina ua mae'a ona tau autilo lenei tama i tama'i motu o Samoa, sa ia fesili loa, 'o ai na tusia lenei fa'afanua?"

E ui i le le fiafia o lenei tama i le laititi o motu o Samoa i luga o fa'afanua, ae peitai ua mafai ona faamaonia mai, le na'o le .3% o tagata i totonu o Amerika, o tagata o le Pasefika (e aofia ai ma tagatanu'u moni o Hawaii). Ia manino, e le o le tolu pasene ae tolu vae sefulu o le pasene e tasi. Ma i lena fuainumera, e to'alaiti lava, o tagata SAmoa.

O lea, e le fa'ate'ia ai le loto, ina ua saunoa se tasi o taitai faalemalo, e latou te le'i silafia, o iai se atunuu ma ni tagata ua ta'ua o Samoa. O lona uiga, e tatau ona o tatou taumafai atili. Ma o le mafua'aga lea e fesoasoani ai le molimauina o se tala i luma o ni nusipepa tetele, e pei o le Chicago Tribune po o le Washington Post, e uiga i alo o Samoa o lo'o tautua i totonu o le militeri, po o ni alo o Samoa ua ta'uta'ua i totonu o le fa'agatama lea o le 'football'.

E moni ua tele ni tagata ta'uta'ua o Samoa i totonu o fa'agatama, e pei o 'football', lakapi, o le sumo ia ma le alii ta'uta'ua lenei o le 'Rock', ae a tu'u ma i tulaga faalemalo po o tulaga faapolokiki, o lo'o tele pea se galuega ua ta'atia mo i tatou. E moni o lo'o iai le susuga Senatoa Daniel Akaka mai Hawaii, se tasi o tagata Polenisia ta'uta'ua i totonu o Uosinitone, faapea ma le susuga Mufi Hannemann, le pulenu'u Samoa i Honolulu, ae ui i lea, e manaomia pea ona tatou galulue malosi e pu'eina avanoa ua mafai ona tu'uina, e mafai ai ona iloa i tatou i totonu o le lalolagi faapolokiki.

O lona uiga, a faasea vaega faasalalau i faigamalaga a tatou taitai lotoifale, i atunuu i fafo, ou te le lagolago pe afai e aoga lea lava faigamalaga mo Amerika Samoa, e pei o le faigamalaga lata mai a le afioga i le Kovana Sili, Togiola Tulafono ma nisi o taitai o Samoa, i Guam mo se fonotaga a le Initeria. Sa mafai foi ona ou auai atu i nisi o fonotaga i atunuu mamao mo aso e sefulu.

Sa mafai ona ou auai atu i se fonotaga a le 'Western Republic Leadership Conference (WRLC)' i San Diego po o se fonotaga mo taitai a taitai o atunuu i le itu i Sasa'e, na mafai ona auai ai le tele o taitai o setete ma teritori i le itu i sisifo. Na tele ni mea taua sa mafai ona maua mai i lenei fonotaga, ma sa avea ma avanoa lelei ou te toe faamanatu atu ai i le kovana o Kalefonia, o Arnold Schwarzenegger, le siisii o le fuainumera o tagata Samoa i totonu o le setete o Kalefonia, aemaise lava le nofoaga totonu na faataunuu ai le fonotaga.

O le vaiaso lava lea e tasi sa faia ai ma Fa'aaliga o Tu ma Aganuu o le Pasefika lona 13 i le nofoaga lava e tasi sa faia ai le fono a le WRLC, ma sa mafai ona ou auai atu ai foi, e toe faafouina masaniga faapea ma le faavaeina o masaniga fou ia ma le auina atu o ni tala i aiga ua leva tu'ua si o tatou atunuu. Na toatele ni fanau talavou Samoa sa fananau i Kalefonia sa mafai ona o matou feiloa'i, ma o le toatele o i latou e le'i o'o mai lava i Samoa, ae peitai, o le lotonu'u ua loloto ia i latou, o se tulaga sa maua ai le agaga mafanafana.

Ou te iloa, ou te tau le aoaoina le komiti a le PIFA sa tu'ufaatasia lenei fuafuaga, i auala e mafai ona faalauiloa atu ai o tatou tagata. Ua iai nei so latou nofoaga autu i le Ski Beach, ma sa sologa lelei polokalama uma na fuafuaina mo le to'a 150,000 na mafai ona malaga atu e maimoa i faafiafiaga ma galuega taulima faapea ma le taumafa i gaosiosiga faa Samoa faapea ma isi atunuu o le Pasefika. Sa mafai foi ona auai le pulenu'u a a San Diego i le tatalaga aloaia o lenei polokalama, ma sa ia tauaaoina atu ai i le PIFA se fa'ailoga e aloaia ai le Aso Pasefika.

Talu ai le taua tele o San Diego ia Amerika Samoa, ona o le nofoaga autu o kamupani gaosi tuna a Amerika, sa ou taumafai ai e asiasi atu i taitai o lenei pisinisi aua se malamalamaaga atili i faafitaui o lo'o feagai ma i latou i le taimi nei, talu ai siitaga o totogi amata faapea ma isi siitaga o lo'o loma. O le a mafai ona maua se auiliiliga o nei fonotaga i se taimi mulimuli mai, ae sa ou fiafia lava e maua lenei avanoa ma ua iai se fuafuaga e toe asia San Diego i se vaitaimi lata mai.

Na iai se faamoemoega e fa'aauauina lau faigamalaga aga'i i Oceanside, Carson ma Torrance e asia nisi o aiga ma uo, ae ou te le'i auai atu i seisi fonotaga i Palm Springs, peitai sa mauaina se valaaulia mai i le tamaitai kovana ia Lingle mo se fonotaga mo taitai tamaitai (4th annual international women's leadership conference), o lea na ou toe fo'i mai ai i Honolulu mo se aso e tasi e auai i lenei fonotaga, ina ia mafai ona iai so tatou sui i lenei polokalama taua.

I lea lava fonotaga sa mafai ona valaaulia ai e le kovana nisi o taitai tamaitai mai Hawaii, mai i atunuu eseese ma sa tofu lava nei taitai ma se mataupu taua sa mafai ona o latou faasoa mai e tusa ai ma a latou galuega, ua mafai ona suia ai le lalolagi mo le lelei. O se fonotaga faagaeetia loto, ma sa tele ni aoaoga taua na mafai ona ou maua mai ai.

O se tasi o mataupu taua sa mafai ona ou maua mai i lenei fonotaga, o auala e mafai ona fesoasoani ai le toatele o tamaitai/tina i isi tina i totonu o a latou galuega. Ua ia i tatou le tiutetauave e fesoasoani ai i fanau tuputupu a'e, ina ia mafai ona tula'i mai i latou ma avea ma taitai o le lumanai.

As always, I would be glad to have your comments. E-mail me at aumuaamata@mail.com.

Osini Faleatasi Inc. dba Samoa News reserves all rights.