Porokalama Auiluma a Amata Aumua
October 12, 2006

Talofa Tutuila ma Manu'a. Muamua ona ou fa'atulou pa'ia o le Atua Silisili Ese. Pa'ia o au faigamalo e lua. Pa'ia fa'aleatunu'u i ia Sua ma le Vaifanua, Fofo ma Aitulagi, Itu'au ma Alataua, Sa'ole ma Launiu saelua. Afioga i Ma'opu ma mamalu i tama matua. Afio Ali'i fa'atui, mamalu mai Tootoo o le Faleula ma upu ia te oe le Manu'a Tele. Ae le vaea pa'ia o le Malo Tuto'atasi, i Tama ma Aiga, Aiga ma Tama, Pule ma Tumua.

Ou te fa'atalofa atu fo'i i nai a'u tuagane sui tauva o Faleomavaega ma Muavaefa'atasi. Ta'alo fa'atausala, seu sila sila, o Samoa o le Ao Mamala.

Ou te talitonu ua 'e fa'apea ane po'o le a lava ua saga taumafai ai Amata, ua tele tausaga. Se'i o'u ta'u atu le pese o le LMS. Fai mai, "E ui i nu'u uma, ou te ta'ua oe, ona o aiga, uso ma tama." Ia, fa'apopo iai ma tina. Aua, e leai se LMS e le iloa le pese lea.

Amerika Samoa ea, e le'o ita o le teine lea na lafi ma lana fuifui aile. Leai, o a'u o lou afafine na fa'afailele i lou eleele. Ua mafua lota naunau i le tofi, se'i fa'ataunu'u tasi lava a'u folafolaga, ta te musu e tu'ua fa'a po evaga le mafutaga. Ae a pe'a sui le sema se'i o'u alu atu ou te ta? E pei ona silafia, e tele tausaga o o'u galue i Uosigitone e avea ma leo o Amerika Samoa i totonu o filifiliga a le Vaega Malosi o le faipule a le Iunaite Setete, ma sa mafai ona fa'afaigofie le tele o mataupu e fa'ataunu'u atu i le laumua.

E lima Poutu o lau Porokalama Auiluma.

POUTU MUAMUA--
IA ATINA'E ATILI LE SOIFUA MALOLOINA I AMERIKA SAMOA
Saili le 'oa mai le Malo Tele e fausia ai se maota gasegase fou. Fa'avae le Fa'alapotopotoga o le Suka i Amerika Samoa, e tu to'atasi ma fa'atupeina e le Malo Tele, e fa'a loloto ai galuega uma o le togafitia ma le tausiga o le ma'i o le suka ma is fa'ama'i ua maua i Amerika Samoa. O pepa taumafa a nai tina ma tama matutua, fai mai le isi toeaina, "Amata, sa sili pe ana tu'u, aisea ua toe pa'u ai i le $20? A'o fea le $40 sa amata ai? E le lava ai se fa'asoa! O la'u tali: O le isi lena mea ou te faia pe'a ou tula'i mai.

POUTU LONA LUA--
ATINA'E A'OGA I AMERIKA SAMOA
Saili le 'oa mai le Malo Tele e fa'atupe ai a'oga fa'a fai a'oga i Amerika Samoa. Fau se auala e maua ai feso'ota'iga mautu ma le Fono Faitulafono o le Iunaite Setete i le sa'iliiliga o sikolasipi eseese mo alo ma fanau. Sa'ili auala ma porokalama a le Malo Tele e fa'atupu tele ai avanoa e a'oa'o ai le tomai fa'apitoa i galuega tau lima i Amerika Samoa

POUTU LONA TOLU--
SA'ILI NISI AUALA E FESOASOANI AI LE ATINA'E O AMERIKA SAMOA
Fa'atino porokalama eseese a le Malo Tele e fa'aopopo ai avanoa tau galuega mo o tatou tagata. Fa'avae se porokalama e fa'aaoga ai le tomai tau pisinisi o o tatou tagata o i le Iunaite Setete o le'a toe taliu mai i fanua. Ia avea Amerika Samoa ma "Nofoaga o Avanoa Manuia i Amerika." E fa'atupe e le Malo Tele. Feso'ota'i lelei ma ofisa o le SBA ma le MBDA mo fesoasoani aoga i le fa'amalosia o avanoa tau pisinisi mo o tatou tagata. Fa'avae se fuafuaga ma le Malo Tele mo feoa'iga i le vasa ma le 'ea i le va o Tutuila ma Hawaii.

Ou te talitonu, e mafai mea uma i le fesoasoani mai o le Ali'i, ma lo tatou tutu fa'atasi. Pei o le pasese i le va o tatou ma Hawaii. Fa'afetai i lau Afioga i le Kovana Sili, malo fai o le faiva. Ua ou manatua upu o le Tusi: "E te faia pea e oe mea sili, ma'e manumalo pea lava."

POUTU LONA FA--
IA FA'ALELEI ATILI FA'AMANUIAGA O FITAFITA TUAI, I LATOU O LO'O TAUTUA I LE TAIMI NEI, ATOA MA LE VAEGA'AU FA'ALEOLEO
Ia mautinoa le amana'ia o mataupu tau tama'ita'i i porokalama tau fitafita tuai. Fa'avae se galuega a le Malo Tele i Amerika Samoa e gafa ma feso'ota'iga o mataupu fa'apitoa mo fitafita tuai e iai o latou totogi, soifua maloloina ma isi lava mana'oga eseese.

POUTU LONA LIMA--YOUTH/SPORTS
O lo'o tele taleni i alo ma fanau a'oga, ae to'aitiiti o lo'o maua avanoa i fafo. O le mea lea, o lo'o iai vaega tupe e tele e mafai ai ona fesoasoani mai ai le Malo Tele e atina'e le loto nu'u ma le saili malo o alo ma fana. Ua manunu'a so'o fanau i ta'aloga ae leai se inisiua. Afai e insure tamaiti Amerika, aisea e le fa'apea ai alo ma fanau a Amerika Samoa? O se tasi lea mata'upu ou te sa'ilia malosi ia maua e tatou.

Tutuila e ma Manu'a, ou te sa'ilia lau palota ia Novema Fitu ma lo'u agaga fa'amaualalo ina ia maua so'u avanoa i le Fono Faitulafono a le Iunaite Setete e fa'amalosi ai le sa'iliga manuia mo o tatou tagata. Fa'amolemole palota mo a'u. Ma lo'u fa'aaloalo tele, o la outou auauna o Amata Aumua.